សួនបណ្តុំសហគ្រាសធុនតូច និងមធ្យម វើលដ៏ប្រ៊ីដ i4.0 ដែលជាបណ្តុំ SME មុនដំបូងបង្អស់នៅក្នុងប្រទេសកម្ពុជា ចាប់ផ្តើមបើកការដ្ឋានសាងសង់ជាផ្លូវការហើយ ដោយមានការគាំទ្រយ៉ាងពេញទំហឹងពី សំណាក់វិស័យឯកជន ក៏ដូចជារាជរដ្ឋាភិបាលកម្ពុជា ជាពិសេស ក្រសួងឧស្សាហកម្ម ហើយសួនបណ្តុំសហគ្រាសធុនតូច និងមធ្យម វើលដ៏ប្រ៊ីដ i4.0 នឹងចូលរួមយ៉ាងសំខាន់នៅក្នុងសកម្មភាពអភិវឌ្ឍន៍ និងលើកម្ពស់វិស័យ SME ដែលជាឆ្អឹងខ្នងសេដ្ឋកិច្ចជាតិឱ្យកាន់តែរីកចម្រើនខ្លាំងឡើងៗ។
លោក ឧកញ្ញ៉ា សៀ ឬទ្ធី ប្រធានក្រុមប្រឹក្សាភិបាលក្រុមហ៊ុនវើលប្រ៊ីដគ្រុប បានថ្លែងនៅក្នុងពិធីបើកការដ្ឋានសាងសង់ចង្កោមសហគ្រាសធុនតូច និងមធ្យម នៅព្រឹកថ្ងៃទី ២៧ ខែវិច្ឆិកា ឆ្នាំ២០២០ បានឲ្យដឹងថា គម្រោងសាងសង់ បណ្ដុំសហគ្រាសធុនតូច និងមធ្យម វើលដ៏ប្រ៊ីដ i4.0 នេះមានរយៈពេល៨ខែ ហើយនឹងបញ្ចប់ក្នុងចុងឆ្នាំ២០២១ ដោយចែងជា៧ផ្នែកសំខាន់ ហើយនឹងផ្តល់អត្ថប្រយោជន៍ដល់សហគ្រាសធុនតូចនិងមធ្យម ឬសហគ្រិននានា ឲ្យយល់ដឹងអំពីសារៈសំខាន់ក្នុងការបង្កើតជាចង្កោមខ្សែសង្វាក់ផលិតកម្មពេញលេញ និងឆ្លើយតបឲ្យគ្នាទៅវិញទៅមក ដែលមានលក្ខណៈជាប្រព័ន្ធអេកូឡូស៊ី នៅក្នុង WORLDBRIDGE I4.0 SME CLUSTER យើងនេះ។ តាមរយៈការវិនិយោគជាផ្លូវការលើសេវាកម្មដែលមានស្តង់ដារ និងហេដ្ឋារចនាសម្ព័ន្ធដែលអាចជឿទុកចិត្តបានសម្រាប់សហគ្រាសធុនតូចនិងមធ្យមនេះ ខ្សែសង្វាក់ផលិតកម្មពិតជាអាចលើកស្ទួយ ផ្តល់តម្លៃ បង្កើតធនធាន ចំណេញពេលវេលា មានស្មារតីច្នៃប្រឌិតផលិតកម្ម និងការគ្រប់គ្រងប្រកបដោយគុណភាព និងប្រសិទ្ធភាពក្នុងការចំណាយ។
មិនតែប៉ុណ្ណោះ គម្រោងទាំងនេះអាចផ្តល់គុណប្រយោជន៍រួម ផ្តល់ការទ្រទ្រង់ដល់គ្នាទៅវិញទៅមក និងធ្វើឲ្យទំនាក់ទំនងក្នុងសហគមន៍កាន់តែល្អ ថែមទាំងអាចជួយជម្រុញឲ្យពលរដ្ឋចូលរួមក្នុងការប្រើប្រាស់ថាមពលកកើតឡើងវិញមានចំនួនកាន់តែច្រើន តាមរយៈការផ្តល់ហិរញ្ញប្បទានសមស្របតាមលទ្ធភាព ដែលមិនបង្កឲ្យមានឱនភាពប៉ះពាល់ដល់សង្គម ផ្ទុយទៅវិញវាអាចផ្តល់ឱកាសឲ្យពលរដ្ឋបន្តមានការរីកលូតលាស់សេដ្ឋកិច្ចគ្រួសារ និងសង្គមប្រកបដោយចីរភាពបានកាន់តែប្រពៃ។
លោក Nick Beresford អ្នកតំណាងនិវេសនដ្ឋាន អង្គការUNDP ប្រចាំប្រទេសកម្ពុជា បានលើកឡើងដែរថា គំនិតផ្តួចផ្តើមបង្កើតតំបន់ប្រមូលផ្តុំសហគ្រាសធុនតូច និងមធ្យមវើលដ៏ប្រ៊ីដ ឧស្សាហកម្មជំនាន់ទី៤ នេះឡើង ជាការអភិវឌ្ឍប្រកបដោយចីរភាព គិតគូរពីផលប៉ះពាល់បរិស្ថាន ជាពិសេស វាគឺជាការអភិវឌ្ឍសម្រាប់យុវជនជំនាន់ក្រោយ ដែលធ្វើឲ្យ ប្រទេសកម្ពុជា កាន់តែមានសមត្ថភាពប្រកួតប្រជែងលើទីផ្សារអន្តរជាតិ។
នាឱកាសនោះ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៏ថា ៉សួនបណ្តុំសហគ្រាសធុនតូច និងមធ្យម វើលដ៏ប្រ៊ីដ ឧស្សាហកម្មជំនាន់ទី៤ គឺពិតជាសំខាន់ណាស់ក្នុងការប្រមូលផ្តុំនូវ SME ការគ្រប់គ្រង និងការជួយជ្រោមជ្រែងវិស័យមួយនេះ ឲ្យរីកចម្រើនឡើងប្រកបដោយចីរភាព ជាពិសេសគឺការប្រើប្រាស់នូវបច្ចេកវិទ្យាទំនើបចុងក្រោយបង្អស់ ដើម្បីអភិវឌ្ឍសេដ្ឋកិច្ចជាតិ ឲ្យដើរទាន់ទៅនឹងតម្រូវការនៅលើទីផ្សារសកលលោក។
លោកឧកញ៉ា តែ តាំងប៉រ ប្រធានសម្ព័ន្ធសហគ្រាសធុនតូច និងមធ្យមកម្ពុជា បានថ្លែងថា វាជារឿងល្អណាស់ដែលកម្ពុជាមានសួនបណ្ដុំសហគ្រាសនេះ ព្រោះវាអាចជួយដល់ម្ចាស់អាជីវកម្ម នៅទីតាំង បញ្ហាប្រឈមនានា ជាពិសេសគឺវាមានភាពងាយស្រួលសម្រាប់រដ្ឋាភិបាលក្នុងការជួយសហគ្រិននៅតែមួយកន្លែង។ ការសាងសង់សួនបណ្ដុំសហគ្រាសធុនតូច និងមធ្យមនៅពេលនេះ វានឹងជួយដល់សហគ្រិននានា ក្នុងការពង្រឹងគុណភាពផលិតផល ហើយក៏អាចផលិតនូវផលិតផលប្រកួតប្រជែងជាមួយទីផ្សារបរទេសផងដែរ៕
