កំពូលតារាចម្រៀងប្រចាំប្រទេសកម្ពុជា លោក ព្រាប សុវត្ថិ បានចុះកិច្ចសន្យា ជាមួយផលិតកម្ម Galaxy Navatra កាលពីរាត្រីថ្ងៃទី២៥ ខែសីហា ឆ្នាំ២០២០ បន្ទាប់ពីលោក បានប្រកាសចូលក្នុងផលិតកម្មនេះ ក្រោយរួមរស់ ជាមួយផលិតកម្មដ៏ធំលំដាប់ទីមួយ ហង្សមាស អស់រយៈពេលជាង ២៣ ឆ្នាំមក។
កំពូលតារាចម្រៀងប្រចាំប្រទេសកម្ពុជា លោក ព្រាប សុវត្ថិ និងម្ចាស់ផលិតកម្ម Galaxy Navatra ប្រកាសជំហរថា នឹងព្យាយាមអោយអស់ពីសមត្ថភាព ដើម្បីប្រកួតប្រជែងទីផ្សារចម្រៀងទាំងនៅក្នុងស្រុក អាស៊ាន និងទៅកាន់ពិភពលោក ក្រោយពីបានចុះហត្ថលេខាទទួលយក លោកព្រាប សុវត្ថិ ធ្វើជាដៃគូសហការជាផ្លូវការក្នុងគ្រួសារ Galaxy។ សម្រាប់លក្ខខ័ណ្ឌ និងអត្ថន័យ នៃចុះកិច្ចសន្យានេះ ក៏មិនទាន់មាន នរណាម្នាក់ដឹង ពីខ្លឹមផ្សាលំអិត នៃកិច្ចសន្យាច្បាស់១០០%នោះទេ។
ហើយក្នុងកម្មវិធីពេលនោះ លោក ព្រាប សុវត្ថិ ក៏មិនបានបកស្រាយ អោយស៊ីជម្រៅ ពីគោលបំណងទាំងអស់នៅឡើយទេ បើមើលតាមរយៈ ការឆ្លើយសំនួររបស់ អ្នកកាសែត លោកគ្រាន់តែ និយាយរួមថា លោក មានគោលដៅរបស់ លោក លើវិថីសិល្បៈចម្រៀង មួយនេះ។ សម្រាប់អ្នកទាំងអស់គ្នាវិញគិត ថា លោក ព្រាប សុវត្ថិ នឹងមានគោលបំណងបែបណា?
ថ្លែងទៅកាន់សិល្បករ-សិល្បការិនី និងភ្ញៀវកិត្តិយសជាច្រើននាក់នៅសណ្ឋាគារ Gaden City ខណ្ឌព្រែកព្នៅ លោក ព្រាប សុវត្ថិ ថាលោកមានបទពិសោធន៍ជាង១៥ឆ្នាំលើវិស័យបទចម្រៀងជាមួយតារាចម្រៀងល្បីៗពីប្រទេសដែលជាសមាជិកអាស៊ាន ដូច្នេះលោកជឿថា នៅថ្ងៃអនាគត លោក និងផលិតកម្ម Galaxy នឹងពង្រីកមុខមាត់របស់ខ្លួនក្នុងនាមសិល្បៈចម្រៀងកម្ពុជាទៅកាន់ប្រទេសទាំងនោះ។
